Hayotdagi xilma-xil voqea hodisalarning tagiga yetish, turli-tuman harakat holatlarga baho berish, katta-kichik tajribalarni umumlashtirish asosida xalq chiqargan xulosalarning o‘ziga xos obrazli ifodalari bo‘lmish frazeologik iboralar badiiy matnda deyarli hamisha poetik aktual bo‘ladi. Shuning uchun ham iboralar badiiy matnning lingvopoetik tahlilida alohida o‘rin tutadi. Iboralardan obrazlilik hamisha sezilib turganligidan, semantik tarkibida kompotatsiya ustuvor bo‘lganligidan so‘zga qaraganda ular badiiy mazmunga faolroq xizmat qiladi. Tohir Mаlik o‘z аsаrida iboralardan o‘ta unumli foydalangan. Har bir ibora to‘g‘ri tanlanganki, asar tili jozibali, ta’sirli bo‘lishiga zamin yaralgan.