Ҳар бир жамиятнинг келажаги унинг ажралмас қисми ва ҳаётий зарурияти бўлган таълим тизимининг қай даражада ривожланганлиги билан белгиланади. Бугунги кунда мустақил тараққиёт йўлидан бораётган мамлакатимизнинг узлуксиз таълим тизимини ислоҳ қилиш ва такомиллаштириш, янги сифат босқичига кўтариш, унга илғор педагогик ва ахборот технологияларини жорий қилиш ҳамда таълим самарадорлигини ошириш давлат сиёсати даражасига кўтарилди. Педагогик технологияларнинг ривожланиши ва уларнинг ўқув тарбия жараёнига кириб келиши, шунингдек ахборот технологияларининг тез алмашинуви ва такомиллашуви жараёнида ҳар бир инсон ўз касбий таёргарлигини, маҳоратини кучайтириш имкониятлари яратилди. Бугунги кунда таълимда, хусусан, чет тилларни ўргатишда инновацион педагогик технологиялар ва интерфаол усуллардан кенг фойдаланилмоқда. Хорижий тил таълимига иннновацион педагогик технологияларнинг татбиқи –шахсни жамиятнинг талабига кўра йўналтириш, таълимни шу талаблар асосида ташкил этиш, таълим тамойиллари, методлари алоқадорлиги асосида шахсни ҳар томонлама етук кадр қилиб шакллантириш, унинг қобилияти ва имкониятларини тўлиқ намоён этиш ва ривожлантириш учун қулай шарт-шароитлар яратишдан иборат. Бугун мамлакатимизда юртбошимиз ташаббуслари билан тил ўрганишга катта эътибор берилмоқда. Юқоридагиларга назар соладиган бўлсак юртимиз тараққиётида тилнинг нечоғлик аҳамиятга эга эканлигига яна бир карра амин бўламиз.