‘Estudos arredor de Ricardo Carvalho Calero’ reúne unha vintena de ensaios de diversos autores nos que se analiza a biobibliografía do escritor homenaxeado co Día das Letras Galegas de 2020. Os artigos analizan tanto as circunstancias do autor no tempo que lle tocou vivir (orixes, Preguerra, Guerra Civil, Posguerra, Democracia e últimos anos) como as diversas facetas que o caracterizan como persoeiro (intelectual, académico, lingüista, narrador, poeta, dramaturgo, autor infantoxuvenil, estudoso da literatura galega de tradición oral). O volume péchase con outras achegas sobre aspectos concretos da súa escrita e labor intelectual, que inclúen o estudo de obras narrativas súas, epistolario por el mantido ou a súa dedicación profesoral.