Los campamentos romanos de Cueiru y El Xuegu la Bola identificáronse en diciembre del 2015 gracies a l’aplicación de varies técniques de procesao y visualización de datos LiDAR de descarga llibre disponibles na páxina web del Instituto Geográfico Nacional. El so análisis posterior fíxose siguiendo una metodoloxía específica que fuimos construyendo mediante la combinación de métodos y fontes informatives variaes Favorezse asina la extracción del máximo d’información y aprovéchase tolo posible’l nuestru esfuerzu investigador. Desque comprobamos nel sitiu la naturaleza arqueolóxica de les estructures que viéramos nos dos enclaves, notificóse la so existencia a les alministraciones competentes en xestión del padremuño pa propiciar la so protección efectiva en diciembre del 2015. Más tarde, desenvolvióse una campaña de trabayu de campu2 que tuvo l’apoyu del Instituto de Ciencias del Patrimonio (Incipit) del Consejo Superior de Investigaciones Científicas, el Grupo de Investigación Síncrisis de la Universidade de Santiago de Compostela, el Conceichu de Teberga y la Dirección Xeneral de Padremuño Cultural d’Asturies.