550 vjetë pas vdekjes së Gjergj Kastriotit Skënderbeut (1405-1468) merren në shqyrtim fragmentet e afreskut të xokolit absidal të kishës së Shën Antonit në Kepin e Rodonit në Shqipëri. Ata paraqesin një shqiponjë dykrenore, një kalorës me kalë dhe një grup lejlekësh. Mbas një rishikimi tipologjik të temave ikonografike, propozohet një vlerësim stilistik dhe kronologjik i pikturimeve në lidhje me veprimtarinë e prijësit të madh të rezistencës shqiptare, në flamurin e së cilës figuronte simboli heraldik i shqiponjës dykrenore. Ky interpretim bëhet duke hequr paralele me dëshmi dukurish të tilla në rajonin në mes Italisë dhe arealit ballkanik në harkun kohor mes shekujve XII dhe XV.