Escribo porque sentín a necesidade de me ler a min mesma. Begoña Caamaño explicou con estas palabras a enerxía creadora da súa obra. A protagonista do Día das Letras Galegas de 2026 é coñecida sobre todo polas dúas novelas que puido legarnos antes da súa morte prematura, mais tamén publicou un relato cheo de forza literaria e mensaxe, “Pel azul e vermella”, no que manexa con arte as claves da literatura breve pero non menor. Forza literaria e mensaxe son tamén ingredientes esenciais das historias premiadas no IX Concurso de microrrelatos da Real Academia Galega e PuntoGal, que creamos para promovermos a expresión literaria na Rede no idioma de noso cun estimulante desafío: contar moito nun máximo de 200 palabras. Velaquí os textos galardoados. Ao se leren a si mesmas, a si mesmos, as sete autoras e dous autores tamén nos len a todas e todos nós. Para nos enfrontar ao que non queremos ver. Para nos aliviar doenzas do corpo e da alma. Para superar medos e preservar a memoria. Para gozarmos da literatura. E da nosa lingua. Porque, sexan cales sexan as nosas raíces, cociñemos empanada ou cuscús, o galego hai que probalo. E repetir sempre.