Синусли тахикардия юрак ритмининг энг кўп учрайдиган бузилишларидан бири бўлиб, катталарда юрак уриш тезлигининг бир дақиқада 100 мартадан ортиқ бўлиши билан тавсифланади. У физиологик ва патологик омиллар таъсирида ривожланиши мумкин. Физиологик ҳолатларда жисмоний юклама, эмоционал стресс, ҳомиладорлик ва иситма сабаб бўлса, патологик ҳолатларда юрак-қон томир касалликлари, анемия, тиреотоксикоз, гипоксия ва инфекциялар муҳим аҳамиятга эга. Мақолада синусли тахикардиянинг этиологияси, патогенези, клиник белгилари, электрокардиографик хусусиятлари, ташхислаш ва замонавий даволаш усуллари таҳлил қилинган.