Echinokokkoz dunyoning ko'plab mamlakatlarida, jumladan O'zbekistonda ham uchraydigan xavfli parazitar kasalliklardan biri hisoblanadi. Kasallikning qo'zg'atuvchisi Echinococcus granulosus va Echinococcus multilocularis tasmasimon gelmintlari bo'lib, ular inson organizmida turli a'zolarda kistalar hosil qiladi. Ushbu maqolada echinokokkozning epidemiologik xususiyatlari, inson salomatligiga ta'siri, kasallikning klinik kechishi, diagnostikasi va profilaktikasi masalalari tahlil qilindi. Tadqiqot davomida mahalliy va xorijiy ilmiy manbalar, epidemiologik ma'lumotlar hamda Jahon sog'liqni saqlash tashkiloti tavsiyalari o'rganildi. Tahlillar echinokokkozning nafaqat tibbiy, balki ijtimoiy-iqtisodiy ahamiyatga ega kasallik ekanligini ko'rsatdi. Kasallikning oldini olishda veterinariya nazorati, sanitariya-gigiyena tadbirlari va aholi o'rtasida profilaktik targ'ibot ishlarini kuchaytirish muhim o'rin tutadi.