Mamlakatimizda ta’lim tizimini modernizatsiya qilish, yosh avlodni har tomonlama barkamol, mustaqil fikrlaydigan va zamonaviy kompetensiyalarga ega shaxs sifatida tarbiyalash davlat siyosatining ustuvor yo‘nalishlaridan biri hisoblanadi. Ayniqsa, boshlang‘ich ta’lim bosqichida o‘quvchilarning mantiqiy, tanqidiy va analitik fikrlash ko‘nikmalarini shakllantirish bugungi kunning dolzarb vazifalaridan sanaladi. Chunki aynan ushbu bosqichda o‘quvchilarning keyingi ta’lim jarayonidagi muvaffaqiyatlari uchun zarur bo‘lgan intellektual salohiyatning poydevori yaratiladi.