Yusuf Xos Hojibning "Qutadg'u bilig" asari turkiy adabiyotning eng qadimiy va yuksak badiiy-falsafiy yodgorliklaridan biri hisoblanadi. XI asrda yaratilgan ushbu asar davlat boshqaruvi, adolat, axloq-odob, insoniy fazilatlar va jamiyatda baxtli hayot kechirish tamoyillarini o'z ichiga oladi. Asarda ideal davlat tuzumi va adolatli hukmdor obrazlari ramziy qahramonlar orqali ifodalanadi: Kuntug'di (adolat), Oyto'ldi (davlat), O'gdulmish (aql) va O'zg'urmish (qanoat) timsollari orqali muallif jamiyatni boshqarishning ma'naviy va siyosiy asoslarini yoritadi.