Sog‘liqni saqlash tizimini raqamlashtirish jarayonida elektron tibbiy yozuvlar (ETY) integratsiyasi tibbiy xizmat sifati va bemorlar xavfsizligini ta’minlashning bosh omiliga aylandi [1]. ETY tizimining asosiy foydalanuvchilari bo‘lgan hamshiralar ma’lumotlarni uzluksiz kiritish va hujjatlar almashinuvini optimallashtirishda markaziy o‘rinni egallaydi [2]. Ushbu tadqiqotning maqsadi sog‘liqni saqlash muassasalarida ETY tizimini joriy etishda hamshiralik xodimlarining o‘rni, ularning raqamli ko‘nikmalari va tizim samaradorligiga ta’sirini adabiyotlar tahlili orqali baholashdan iborat. Maqolada tizimli sharh metodologiyasidan foydalanildi. PubMed, Scopus va Google Scholar ma’lumotlar bazalaridan 2018–2026-yillar oralig‘ida chop etilgan 35 ta dolzarb ilmiy maqola va klinik tadqiqotlar saralab olinib, qiyosiy tahlil qilindi. Qidiruvda "elektron tibbiy yozuvlar", "hamshiralik parvarishi" va "ish samaradorligi" kabi kalit so‘zlar qo‘llanildi. Adabiyotlar tahlili shuni ko‘rsatdiki, ETY tizimining to‘g‘ri integratsiyasi hamshiralar tomonidan hujjatlashtirishga ketadigan vaqtni 24-30% gacha qisqartiradi va hamshiralik xatolarini sezilarli darajada kamaytiradi [3]. Biroq, hamshiralarning axborot texnologiyalari bo‘yicha ko‘nikmalari yetishmasligi dastlabki bosqichlarda kasbiy stressni keltirib chiqarishi va hamshira-bemor muloqotining 15% gacha pasayishiga sabab bo‘lishi aniqlandi [4]. ETY tizimini muvaffaqiyatli joriy etish faqatgina texnik ta’minotga emas, balki bevosita hamshiralarning raqamli kompetensiyasiga bog‘liq. Hamshiralarni tizim loyihalashtirish bosqichiga jalb etish va maqsadli malaka oshirish kurslarini tashkil etish tibbiy logistika samaradorligini oshiradi. ETY hamshiralik parvarishini standartlashtirish va dalillarga asoslangan amaliyotni rivojlantirishda strategik vositadir