Mazkur maqolada O'zbekistonda tadbirkorlik va kichik biznes subyektlarining iqtisodiy xavfsizligini ta'minlash hamda ularni davlat tomonidan qo'llab-quvvatlash mexanizmlarining ilmiy-amaliy jihatlari tahlil qilinadi. Tadqiqot 2020–2024-yillarni qamrab olib, kichik biznesning milliy iqtisodiyotdagi o'rni va davlat qo'llab-quvvatlash siyosatining samaradorligini statistik ma'lumotlar asosida baholaydi. Kichik tadbirkorlik subyektlarining yalpi ichki mahsulotdagi ulushi 2020-yilda 56,7 foizni, 2024-yilda 53,5 foizni tashkil etgan. Tadqiqotda moliyaviy resurslarga kirish imkoniyati, kredit stavkalari, institutsional muhit barqarorligi va moliyaviy qo'llab-quvvatlash instrumentlarining kichik biznes iqtisodiy xavfsizligiga ta'siri o'rganildi. Amaliy misol sifatida Uzum Market platformasining rivojlanish tajribasi tahlil qilindi. Natijalar institutsional mexanizmlarni takomillashtirish, risklarni boshqarish tizimini rivojlantirish va tadbirkorlikni qo'llab-quvvatlash siyosatini yanada samarali shakllantirish uchun ilmiy asos bo'lib xizmat qiladi.