Ushbu maqolaning maqsadi O‘zbekiston Respublikasida investitsiya siyosatining mazmun-mohiyati, uning shakllanishi va rivojlanish bosqichlari hamda milliy iqtisodiyotga ta’sirini tahlil qilishdan iborat. Tadqiqotda asosiy e’tibor to‘g‘ridan-to‘g‘ri xorijiy investitsiyalarning (TTXI) iqtisodiy o‘sishdagi o‘rni, ularning dinamikasi va tarkibiy xususiyatlarini o‘rganishga qaratilgan. Statistik ma’lumotlar asosida asosiy kapitalga investitsiyalar hajmining o‘sish tendensiyalari, xorijiy investitsiyalar ulushining ortishi va investitsiya muhitining liberallashuvi natijalari tahlil etilgan. Shuningdek, TTXIning iqtisodiyotga ta’sirini baholash mezonlari, jumladan, YaIMga nisbati, eksportdagi ulushi, kapital unumdorligi va yangi ish o‘rinlari yaratishdagi ahamiyati asoslab berilgan. Tadqiqot natijalariga ko‘ra, investitsiya siyosatini takomillashtirish va sifatli xorijiy investitsiyalarni jalb qilish mamlakat iqtisodiy taraqqiyotining muhim omili ekanligi aniqlangan.