Mazkur ishda Gumsoy uchastkasidagi oltin-sulfid rudalarini boyitishning samarali texnologiyasini ishlab chiqish va asoslash masalalari o‘rganildi. Tadqiqot davomida ruda namunalarining mineralogik va kimyoviy tarkibi tahlil qilinib, oltinning asosan pirit va arsenopirit minerallari bilan bog‘langan holda, juda mayda dispers shaklda uchrashi aniqlandi. Bu esa an’anaviy boyitish usullarining samaradorligini pasaytirishini ko‘rsatdi. Shu munosabat bilan gravitatsion va flotatsion boyitish usullari alohida va kombinatsiyalangan holda sinovdan o‘tkazildi. Olingan natijalar asosida kombinatsiyalangan gravitatsion–flotatsion sxema oltinni samarali ajratib olish uchun eng maqbul usul sifatida tavsiya etildi.