Annotatsiya. Ayol ishchilarning ovqatlanish statusi mehnat gigiyenasi va kasbiy salomatlikni belgilovchi muhim omillardan biri hisoblanadi. Sanoat korxonalarida faoliyat olib borayotgan ayollar ko‘pincha yuqori jismoniy va psixo-emotsional yuklama, ishlab chiqarish omillari hamda ijtimoiy-iqtisodiy sharoitlar ta’sirida faoliyat yuritadilar. Bunday sharoitlarda ovqatlanishning sifati va ratsionning muvozanatlanganligi ayollar sog‘lig‘i hamda mehnat unumdorligiga sezilarli ta’sir ko‘rsatadi. Mazkur maqolada ayol ishchilarning ovqatlanish statusi bo‘yicha mavjud ilmiy tadqiqotlar tizimli ravishda tahlil qilindi. Tadqiqot 2010–2025 yillar oralig‘ida nashr etilgan ilmiy maqolalarni o‘rganish asosida amalga oshirildi. Adabiyotlar Scopus, Web of Science, PubMed va Google Scholar ilmiy bazalaridan tanlab olindi. Tahlil natijalari ayol ishchilar ratsionida uglevod mahsulotlari ustunligi, mikroelement yetishmovchiligi hamda temir tanqisligi anemiyasi keng tarqalganligini ko‘rsatdi. Shuningdek, ovqatlanish statusi va mehnat unumdorligi o‘rtasida sezilarli bog‘liqlik mavjudligi aniqlangan. Ish joyida tashkil etilgan ovqatlanish dasturlari ayol ishchilarning sog‘lig‘ini yaxshilashi mumkinligi ko‘rsatildi. Tadqiqot natijalari sanoat korxonalarida ratsional ovqatlanish tizimini joriy etish, gigiyenik monitoringni kuchaytirish va profilaktik ovqatlanish dasturlarini ishlab chiqish zarurligini asoslaydi.