Ang pag-aaral na ito na pinamagatang “Isang Kritikal na Pagsusuri sa mga Palitang-Kuro ng mga Pangunahing Tauhan sa mga Piling Pelikulang Pilipino” ay naglalayong suriin ang mga pahayag ng mga pangunahing tauhan sa Hello, Love, Goodbye (2019) at Hello, Love, Again (2024). Tinutukoy nito kung paano naipapahayag sa pamamagitan ng dayalogo ang tuwirang damdamin, layunin, at karanasan sa buhay ng mga tauhan, gayundin ang mga aspetong nagpapakita ng kultural na pagpapahalaga, kritikal na pag-iisip, at mga isyung panlipunan. Ginamit sa pag-aaral ang deskriptibong disenyo na may kwalitatibong pamamaraan. Sinuri ang mga piling eksena at dayalogo gamit ang thematic analysis. Nakaangkla ang pagsusuri sa Cognitive Theory of Multimedia, Critical Discourse Analysis, at Formalismo o New Criticism upang higit na maunawaan ang kahulugan at konteksto ng mga pahayag. Natuklasan na ang mga palitang- kuro ay nagsisilbing mahalagang daluyan ng pagpapahayag ng damdamin, mithiin, at karanasang panlipunan ng mga tauhan. Lumitaw din na ang mga dayalogo ay naglalaman ng mga pagpapahalagang kultural tulad ng sakripisyo, pagmamahal sa pamilya, at pagpapahalaga sa sarili, gayundin ng mga isyung panlipunan gaya ng migrasyon at paghahanap ng identidad.