Qandli diabet bilan og‘rigan bemorlarda og‘iz bo‘shlig‘i shilliq qavati kasalliklari keng tarqalgan bo‘lib, ular organizmdagi metabolik buzilishlar, mikrotsirkulyatsiya o‘zgarishlari, immun himoyaning pasayishi hamda infeksion omillarning faollashuvi bilan chambarchas bog‘liq. Mazkur mavzu qandli diabet fonida og‘iz bo‘shlig‘i shilliq qavatida uchraydigan patologik o‘zgarishlarni klinik va laborator jihatdan o‘rganish, ularni erta aniqlash hamda to‘g‘ri tashxislash masalalariga bag‘ishlangan. Tadqiqot davomida bemorlarda og‘iz bo‘shlig‘i shilliq qavatining holati, yallig‘lanish belgilarining darajasi, subyektiv shikoyatlar, glyukoza ko‘rsatkichlari, mikrobiologik va umumiy laborator tahlillar baholandi. Shuningdek, diabetning davomiyligi, og‘irlik darajasi va kompensatsiya holatining og‘iz bo‘shlig‘i kasalliklari rivojlanishiga ta’siri tahlil qilindi. Olingan natijalar qandli diabetli bemorlarda og‘iz bo‘shlig‘i shilliq qavati kasalliklarini erta tashxislash, ularni differensial baholash va samarali davolash-profilaktika choralarini ishlab chiqishda muhim ahamiyat kasb etadi.