G‘o‘za qishloq xo‘jaligining muhim texnik ekinlaridan biri bo‘lib, uning hosildorligi ko‘plab kasalliklar ta’sirida sezilarli darajada kamayadi. Ayniqsa ildiz chirish kasalligi g‘o‘za nihollarining nobud bo‘lishiga va hosilning pasayishiga sabab bo‘ladigan eng xavfli kasalliklardan biridir. Mazkur tadqiqot ishida g‘o‘zaning ildiz chirish kasalligiga qarshi qo‘llaniladigan zamonaviy urug‘ dorilari samaradorligi tahlil qilindi. Ilmiy adabiyotlar va tajriba natijalari asosida Vitavax-T70, Vitavax-T40, Maxim, Topsin-M, Rizolex-T, shuningdek karboksin va tiram asosidagi preparatlarning biologik samaradorligi baholandi. Tadqiqotlar shuni ko‘rsatdiki, urug‘larni fungitsidlar bilan dorilash nihollarning unib chiqish darajasini oshiradi, ildiz chirish kasalligini kamaytiradi hamda hosildorlikni sezilarli darajada ko‘paytiradi. Natijalar zamonaviy urug‘ dorilari g‘o‘za yetishtirishda muhim himoya chorasi ekanligini ko‘rsatadi.