Mazkur maqolada jadidchilik harakatining yirik namoyandasi Abdulla Avloniyning “Turkiy Guliston yoxud axloq” asarida ilgari surilgan ta’lim va tarbiya haqidagi pedagogik qarashlar ilmiy jihatdan tahlil qilinadi. Asarda tarbiya shaxs kamolotining asosiy omili, jamiyat taraqqiyotining muhim sharti sifatida talqin etiladi. Muallif ta’lim va tarbiyaning o‘zaro uzviy bog‘liqligini asoslab, oilaviy, maktab va ijtimoiy tarbiyaning ahamiyatini ochib beradi. Shuningdek, muallim shaxsiga yuklangan mas’uliyat, axloqiy tarbiyaning ustuvorligi hamda ta’limning ma’naviy vazifalari yoritiladi. Tadqiqot natijalari Avloniyning pedagogik qarashlari bugungi zamonaviy ta’lim tizimi uchun ham dolzarb nazariy va amaliy ahamiyatga ega ekanini ko‘rsatadi.