मातृतीर्थ माहूर हे महाराष्ट्रातील एक अत्यंत प्राचीन व पवित्र धार्मिक तीर्थक्षेत्र असून नांदेड जिल्ह्यात स्थित आहे. माहूर येथे विराजमान असलेली श्री रेणुका माता ही भारतातील ५१ शक्तीपीठांपैकी एक तसेच महाराष्ट्रातील साडेतीन शक्तीपीठांपैकी एक मानली जाते. पुराणकथा, आख्यायिका व धार्मिक परंपरांमुळे माहूरला विशेष धार्मिक महत्त्व प्राप्त झाले आहे. भगवान परशुराम, दत्तात्रेय व माता अनसूया यांच्याशी संबंधित स्थाने, तीर्थकुंडे, मंदिरे व माहूरगड हा प्राचीन किल्ला यांमुळे हे क्षेत्र धार्मिक व ऐतिहासिक दृष्टीने समृद्ध आहे. या लेखात माहूरच्या धार्मिक परंपरा, आख्यायिका, रेणुकादेवीचे मंदिर, मूर्तीस्वरूप, तसेच माहूरगडाचा ऐतिहासिक विकास यांचा सविस्तर अभ्यास करण्यात आला आहे. दरवर्षी लाखो भाविक दर्शनासाठी येथे येतात, त्यामुळे धार्मिक पर्यटनाच्या दृष्टीने माहूरचे स्थान महत्त्वाचे ठरते. धार्मिक पर्यटनामुळे स्थानिक अर्थव्यवस्थेला चालना मिळते; मात्र वारसा स्थळांचे संवर्धन, पायाभूत सुविधा, स्वच्छता व व्यवस्थापन या बाबींकडे अधिक लक्ष देणे आवश्यक आहे. योग्य नियोजन व संवर्धनाच्या माध्यमातून मातृतीर्थ माहूर हे धार्मिक पर्यटनाचे एक प्रमुख केंद्र म्हणून अधिक विकसित होऊ शकते, असा निष्कर्ष या अभ्यासातून मांडण्यात आला आहे.