Bu tədqiqatın məqsədi Gədəbəy rayonunda eroziyaya uğramış torpaqların strukturunda mikro və makroaqreqat tərkibini təhlil etməkdir. Torpaq aqreqatları torpağın məhsuldarlığı, suyun saxlanması və eroziyaya qarşı dayanıqlığı üçün vacib rol oynayır. Tədqiqat çərçivəsində eroziya nəticəsində torpağın strukturunda baş verən dəyişikliklər qiymətləndirilmiş, mikro (0,25 mm-dən kiçik) və makro (0,25 mm-dən böyük) aqreqatların nisbəti və paylanması müəyyən edilmişdir. Nəticələr göstərir ki, eroziya torpağın makroaqreqat tərkibini azaldır və mikroaqreqatların nisbətini artırır, bu da torpaq məhsuldarlığının və su-hava rejiminin pozulmasına səbəb olur. Əldə olunan məlumatlar Gədəbəy rayonunda torpaqların bərpası və aqroekoloji idarəetmənin təkmilləşdirilməsi üçün əsas göstəricilər kimi istifadə oluna bilər.