Ushbu ilmiy maqolada iste’molchilarning psixologik xatti-harakatlari, xususan, Snob va Veblen effektlarining iqtisodiy va ijtimoiy mazmuni tahlil qilingan. Zamonaviy marketing nazariyalari shuni ko‘rsatadiki, xaridorlarning xarid qarorlariga faqatgina ehtiyoj yoki narx omili emas, balki ijtimoiy maqom, o‘ziga xoslik, boshqalardan ajralib turish hamda e’tibor markazida bo‘lish istagi kabi psixologik omillar ham kuchli ta’sir ko‘rsatadi. Snob effekti iste’molchining mahsulotni ommaviylashgani uchun rad etishi bilan izohlanadi, Veblen effekti esa narxning oshishi bilan birga tovarning qadri ortishini ifodalaydi. Tadqiqot davomida ushbu effektlarning farqli jihatlari, o‘zaro aloqadorligi va marketing amaliyotidagi o‘rni tahlil qilindi. Natijalar shuni ko‘rsatadiki, bugungi global bozorda ko‘plab brendlar aynan shu psixologik mexanizmlardan foydalanib, xaridor e’tiborini jalb etishda muvaffaqiyat qozonmoqda.