[Resumo] Introdución: O fútbol é o deporte máis popular en España e Galicia, con miles de licenzas federativas. A alta participación leva consigo unha considerable incidencia de lesións, especialmente nas extremidades inferiores. A literatura científica comunmente non presta atención aos factores ambientais clave como o tipo de céspede e o calzado na análise dos mecanismos lesionais, deixando un baleiro de coñecemento relevante. Obxectivo: Este estudo tivo como obxectivo principal determinar o perfil lesional dos futbolistas en Galicia e analizar a relación entre a prevalencia de lesións, o tipo de céspede e o tipo de calzado utilizado. Metodoloxía: Realizouse un estudo transversal mediante a técnica de enquisa, empregando un cuestionario ad hoc elaborado especificamente para este estudio e distribuído a través da Federación Galega de Fútbol durante os meses de abril e maio. A enquisa recolleu datos sobre a prevalencia e tipo de lesións sufridas dende a tempada 2023/24 ata a actual 24/25, hábitos de adestramento e competición, tipos de terreo de xogo, antigüidade e estado do céspede artificial, uso e renovación do calzado, e hábitos de prevención e recuperación. Resultados: Participaron 544 futbolistas galegos (83,6% homes; idade media 20,51 ± 8,496 anos), principalmente de fútbol base e amateur (51,7% e 44,3% respectivamente). Un 60,8% dos participantes reportou ter sufrido lesións, cunha estimación de 5,27 lesións por cada 1000 horas de exposición. As lesións máis frecuentes foron as escordaduras de nocello (25,46%) e as distensións/roturas fibrilares (19,37%), xunto con abrasións por céspede (12,18%) e patoloxías de xeonllo. A maioría das lesións ocorreron durante o partido (59,6%). O céspede artificial representa a superficie predominante (máis do 92% de uso para adestramentos e partidos), e moitos campos son descritos como "moi desgastados" ou "moderadamente desgastados". O taco máis usado é o MG (31,2%), pero observouse un uso considerable de tacos FG (concibido para céspede natural) en superficies artificiais. Un 64,9% dos xogadores afirmou non cambiar de botas segundo o terreo, e un 14,2% non realiza ningún tipo de prevención de lesións. As análises de táboas cruzadas non amosaron significación estatística mediante o estatístico Chi2, pero si patróns suxestivos como maior porcentaxe de lesións en terra/areoso e superficies irregulares. Conclusións: A alta prevalencia de lesións nas extremidades inferiores en futbolistas galegos, xunto coa intensa explotación das instalacións de céspede artificial (369 campos para 3733 equipos) e o uso inadecuado do calzado, suxiren a existencia de factores de risco ambientais relevantes. A falta de coñecemento dos xogadores sobre o estado do céspede e o escaso asesoramento podolóxico profesional son áreas clave a mellorar. É crucial mellorar as condicións das instalacións e educar aos deportistas sobre a elección adecuada do calzado para optimizar a seguridade e o rendemento.