[Resumo] Este Traballo de Fin de Grao analiza o comportamento informacional das poboacións rurais lucenses a través das teorías desenvolvidas por Elfreda Chatman: a Teoría do Pequeno Mundo, a Teoría da Pobreza de Información e a Teoría da Vida en Círculo. O obxectivo principal, foi comprobar se estas teorías se reflicten na forma na que as persoas acceden, comparten e procesan a información. Entre os obxectivos específicos, están identificar as fontes de información máis utilizadas e avaliar o nivel de habilidades dixitais e informacionais, así como observar patróns comúns de comportamento cara á información. A metodoloxía combinou técnicas cualitativas (entrevistas semiestruturadas, observación directa) con ferramentas cuantitativas (estatística: táboas e gráficos elaborados en Excel, onde se analizaron os datos recollidos). Entrevistáronse un total de 42 persoas de diferentes idades e perfís en tres aldeas da provincia de Lugo: Betote, Toldaos e San Salvador de Toldaos. Os resultados confirman que estas poboacións se comportan como "pequenos mundos", onde a información circula principalmente a través do boca a boca, con escasa verificación (xa que adoita proceder de persoas coñecidas), dentro de círculos pechados e cunha desconfianza xeral cara ás fontes externas (que adoitan verificar máis). Detectouse unha baixa presenza de habilidades dixitais, especialmente entre a xente maior, e un uso limitado das redes sociais. As principais fontes de información foron a televisión, WhatsApp (como aplicación de mensaxería) e o xornal, tanto en formato impreso como dixital. En conclusión, as teorías de Chatman resultan aplicables positivamente ao contexto rural lucense, poñendo de manifesto unha clara pobreza informacional.