Denne oppgåva tek sikte på å kasta lys over korleis FrP og SV innramma temaet innvandring. Problemstillinga for oppgåva er: Korleis innramma FrP og SV temaet innvandring? I tillegg til den overordna problemstillinga, skal oppgåva forsøkja å svara på seks forskingsspørsmål: Korleis innramma FrP og SV spørsmålet kring innvandring med bakgrunn i partiprogramma frå tidsperioden 2009 – 2013, 2013 – 2017 og 2017 - 2021? Korleis innramma FrP og SV spørsmålet kring innvandring i Stortinget i tidsperioden frå 2009 - 2019? Korleis innramma FrP og SV spørsmålet kring innvandring i media i tidsperioden frå 2009 - 2019? Kva er skilnadar og likskapar i korleis desse to partia nyttar innramming i media og Stortinget, samanlikna med deira partiprogram? Kva er skilnadane og likskapane generelt mellom FrP og SV? Korleis kan me forklara desse skilnadane og likskapane? Oppgåva skal ved hjelp av teori kring innramming, teori om kommunikativ og koordinerande diskurs, teori om skiljelinjer, samt teori om ansvarleggjering forsøkja å svara på problemstillinga saman med ei kvalitativ og ei kvantitativ tilnærming. Datagrunnlaget til oppgåva er partiprogramma til FrP og SV frå 2009 – 2021, stortingsreferat frå 2009 – 2019, samt mediefråsegn frå 2009 – 2019. Analysen syner at det er skilnadar i korleis FrP og SV innramma temaet i dei tre ulike kanalane partiprogram, Stortinget og i media, og at FrP og SV legg vekt på ulike aspekt når dei innramma temaet innvandring.