Dette masterprosjektet har vore ei kvalitativ studie, med tekstanalyse som metode. Det vart samla inn essay om seksualitetsundervisning frå elevar, frå to skular i ulike geografisk og kulturelle kontekstar. Det vart totalt samla inn 26 essay, 14 frå ein byskule og 12 frå ein distriktsskule. Formålet med denne oppgåva er å kasta lys over seksualitetsundervisning på ungdomsskulen,og korleis elevar frå to ulike stadar, by og distriktsområde, beskriv sine opplevingar av seksualitetsundervisning, også med eit særleg blikk på eksterne aktørar, undervisningsressursar og kjønn. Analysen har teke utgangspunkt i Marianne Støle-Nilsen sine 4 tilnærmingar til seksualitetsundervisning: helsetilnærminga, kriminalitetstilnærminga, kjønn og mangfaldstilnærminga og danningstilnærminga. Funna indikerer at dei to skulane har vekta tematikkar innanfor helsetilnærminga i størst grad,medan fokuset på tematikkar innanfor dei andre tilnærmingane varierer. Distriktsskulen har i hovudsak fokusert på helse- og kriminalitetstilnærminga, noko som kan ha årsakssamanheng med at dei eksterne aktørane som har vore brukt er helsesjukepleiar, politiet og utekontaktar. I byskulen har tyngda vore på helsetilnærminga og kjønn og mangfaldstilnærminga. Dei eksterne aktørane brukt i byskulen er jordmor og medisinstudentar frå organisasjonen Medisinernes seksualopplysning. Kva tilnærmingar som har vore vekta i følgje elevane visar tendensar til at dei eksterne aktørane og undervisningsressursane som har vore brukt i stor grad påverkar kva som har vore fokuset i seksualitetsundervisninga. I tillegg visar det særlege fokuset på reproduksjon og risiko i begge skulane tendensar til ei ekskludering av normkritiske perspektiv i undervisninga. Fleire elevar på tvers av skulane uttrykkjer misnøye til mengda av seksualitetsundervisning, samt kva tematikkar som har og ikkje har vore teke opp. Nokre saknar undervisning om sex som ikkje handlar om reproduksjon og risiko, samt trekk også fleire fram at dei allereie kunne mykje om tematikkane då det vart undervist om dei. Funna indikerer teikn til at begge skulane til dels har eit heteronormativt perspektiv og har manglar i seksualitetsundervisninga, både med tanke på tematikkar og normkritiske perspektiv. Seksualitetsundervisninga i begge skulane inkluderer svært mange tematikkar, men visar tendensar til manglar som då ikkje gjer det like heilskapleg som er den ynskja seksualitetsundervisninga i norsk skule i dag.

Master i grunnskolelærerutdanning 5. - 10. trinn, samfunnsfag. Høgskulen på Vestlandet

MGUSA550