Kritisk tenking har fått eit auka fokus i skulesamanheng etter innføringa av den nye læreplanen, Kunnskapsløftet (LK20). Omgrepet har ei kompleks tyding og det finst ulike definisjonar. På den måten vert det eit stort tolkingsrom for lærarar som skal arbeide med kritisk tenking i skulen. I denne studien har eg undersøkt korleis ein matematikklærar på mellomtrinnet forstår omgrepet kritisk tenking, og sett på korleis ei autentisk matematikkoppgåve kan vere med å fremje kritisk tenking. Problemstillinga for studien er: Korleis forstår ein matematikklærar på mellomtrinnet omgrepet kritisk tenking, og korleis kan ei autentisk matematikkoppgåve brukast for å legge til rette for kritisk tenking? I studien har eg nytta eit forskingsdesign kalla Design-based research (DBR) for svare på problemstillinga. Eg har gjennom to intervju av ein lærar og observasjon av den same læraren i klasserommet, samla inn kvalitative data. Læraren har eg samarbeida tett med gjennom heile perioden. I lag har me utarbeida eit undervisningsopplegg basert på ei autentisk matematikkoppgåve, der elevane skulle bygge sine eigne modellhus. Læraren har gjennomført undervisningsopplegget i si eiga klasse, ei sjetteklasse, medan det har blitt observert undervegs. Funn frå studien viser at læraren ser på eit trygt læringsmiljø som avgjerande for utvikling av elevane si kritiske tenking. I tillegg vert diskusjon og munnleg matematikk, samt at mange får sjansen til å svare, trekt fram som viktige aspekt ved det å legge til rette for kritisk tenking. Vidare viser det seg at samarbeid og det å finne løysingar i lag med andre, står sentralt. Læraren har tru på utforskande og problemløysande oppgåver i arbeid med å utvikle elevane sine evner til kritisk tenking. Dessutan meiner læraren at kritisk tenking også handlar om å kunne vurdere om eigne eller andre sine svar på oppgåver verkar fornuftige. Om autentiske oppgåver hevda læraren i det avsluttande intervjuet, at elevane såg ut til å verte meir kritisk tenkande fordi dei kunne relatere sitt eige husprosjekt til ekte husbygging me hadde fått sett gjennom eit innleiande bedriftsbesøk.

Master i didaktiske praksiser. Høgskulen på Vestlandet, campus Bergen

MDIP550