É de especial relevancia para unha sociedade, e máis a raíz da crise económica na que están sumidas as sociedades española e portuguesa, coñecer cales son os colectivos máis débiles ou vulnerables ante a mesma. Un dos colectivos que máis protección necesita é o dos máis novos (infancia/adolescencia). Coñecer a situación e as características da poboación infantil/xuvenil é clave para chamar a atención sobre a gravidade da situación e reclamar das autoridades que correspondan a necesaria actuación. O obxectivo da estadía sería realizar unha análise do benestar e/ou pobreza infantil na Eurorrexión Galiza – Norte de Portugal explorando as principais metodoloxías existentes e realizando unha análise empírica desta problemática a través dos microdatos dispoñibles. Ademais, tamén poderemos obter os perfís dos fogares (tipoloxía do fogar, nivel de estudos dos pais, etc.) nos que os máis novos se atopan en maior situación de vulnerabilidade e risco de exclusión social. Tamén cabe a posibilidade de extraer conclusións acerca das diferenzas/similitudes do benestar infantil nas dúas rexións que forman a Eurorexión Galiza-Norte de Portugal.