Introdución: A actividade física é fundamental para o benestar físico, mental e social, especialmente durante a infancia. Porén, as taxas actuais de inactividade e sedentarismo infantil son preocupantes e están relacionadas cun desenvolvemento insuficiente das habilidades motrices básicas (HMB). Estas habilidades son clave para favorecer estilos de vida saudables ao longo da vida. Neste contexto, a falta de estándares que definan unha competencia motriz normativa dificulta a detección temperá de posibles atrasos. Obxectivos: Analizar o desenvolvemento das HMB de nenos/as de Galicia entre 6 e 12 anos co fin de estandarizar os valores normativos de desenvolvemento da competencia motriz. Material e métodos: Estudo observacional no que 437 nenos/as galegos/as de entre 6 e 12 anos participaron na avaliación de 21 HMB. As habilidades foron avaliadas por tres avaliadores adestrados empregando a aplicación Alfamov, que permite unha valoración sistemática da competencia motriz. Calculáronse as puntuacións obtidas polos nenos/as en cada habilidade tendo en conta o ciclo educativo e o sexo e analizáronse as diferenzas entre eles empregando as probas non paramétricas Kruskall-Wallis ou U de Mann Whitney, segundo correspondese. Resultados: Observouse unha mellora progresiva nas HMB a medida que aumenta a idade. As nenas destacaron nas habilidades de estabilidade (Me=30,0 (26,0-34,0) vs Me=27,0 (22,0-31,0) puntos; p<0.001), mentres que os nenos obtiveron mellores resultados nas manipulativas (Me=43,0 (37,0-47,0) vs Me=35,0 (30,0-40,0) puntos nas nenas p<0,001). As diferenzas por sexo foron máis evidentes no segundo ciclo educativo. Conclusións: Observouse un desenvolvemento progresivo das HMB co avance da idade, con mellores resultados nas habilidades manipulativas nos nenos e de estabilidade nas nenas. As primeiras habilidades adquiridas foron correr ou a recepcionar, mentres que se identificaron habilidades máis complexas coma o bateo, cambio de dirección ou os volteos que tardaron en desenvolverse. Os achados permiten orientar a avaliación da competencia motriz e detectar posibles atrasos no seu desenvolvemento.