Introdución: Realizar actividade física regularmente é fundamental para levar a cabo con destreza actividades motrices, que establecen a base para un estilo de vida activo e saudable. Non obstante, na actualidade, non se están alcanzando os mínimos requiridos, o que pon de manifesto un aumento considerable da inactividade física e do sedentarismo. Isto repercute negativamente no desenvolvemento motor na infancia e en etapas posteriores, xa que as actitudes que se adquiren sendo nenos/as tenden a manterse no resto da vida. Outros factores a considerar son os sociais e contextuais, pouco estudados e importantes na alfabetización motriz. Obxectivo: Determinar os factores biolóxicos, sociais e contextuais que inflúen no desenvolvemento das habilidades motrices básicas locomotrices en nenos e nenas de 6 a 12 anos de Galicia. Metodoloxía: Estudo observacional correlacional que avaliou a competencia motriz de 502 nenos e nenas de 6 a 12 anos pertencentes á etapa primaria e sen impedimentos físicos, os cales realizaron dez habilidades locomotrices (como carreira, salto cun pé, desprazamento lateral) e cuxos pais, nais ou titores legais cubriron un cuestionario sobre datos sociodemográficos e práctica deportiva do/a menor. Analizouse a relación da competencia motriz coas variables sociodemográficas mediante unha regresión lineal múltiple. Resultados: As habilidades locomotrices asociáronse de xeito positivo e significativo coa idade (t=16,755; p<0,001) e a práctica de actividade física regular (t=4,086; p<0,001), e negativamente co índice de masa corporal (t=-7,175; p<0,001). A habilidade na que os participantes demostraron maior competencia foi o desprazamento lateral, mentres que no de cambio de dirección obtiveron peores puntuacións. Conclusións: A competencia motriz na infancia está influenciada pola idade, o índice de masa corporal e a práctica deportiva habitual, relacionadas co ámbito individual dos nenos/as. Estes achados apoian a adquisición de hábitos saudables que permitan a mellora das habilidades locomotrices e o seu mantemento no tempo.