O corpo é territorio de guerra. En, por, e a través do corpo desenvólvense disciplinas que converten o corporal –individual e colectivo– nun terreo de conflito e nun universo por colonizar. Pois as guerras non só se libran en territorios xeográficos. As guerras –as súas invasións, os seus abusos, as súas violencias, as súas humillacións, os seus sometementos– pasan innegabelmente polo dominio dos corpos. Ao fin, un corpo que se rende é un corpo que se invade e coloniza. A través da rendición dos corpos que xa non poden loitar máis, invádense os territorios.