Dende hai décadas, a UNESCO reivindica a nivel internacional a necesidade de incorporar a educación sexual nos currículos educativos. A educación sexual ten como obxectivo comprender que a sexualidade é unha parte integral da vida dos seres humanos e, como tal, contribúe ao desenvolvemento e benestar das persoas. En España, na Educación Primaria, a lexislación educativa establécea como obxectivo das Ciencias da Natureza, atendendo ás dimensións física, emocional, ética e social. Pese a isto, en moitas aulas séguese a falar en exclusiva da dimensión biolóxica da reprodución humana. O presente TFG persegue o obxectivo central de coñecer o impacto da implantación dunha proposta de educación sexual, baseada no modelo de educación sexual integral (ESI), nas aprendizaxes do alumnado participante de 6º de Educación Primaria. A metodoloxía de traballo presenta un carácter cualitativo do estudo dun caso concreto do que se recolleron as respostas obtidas dende o inicio ata o final da realización da implantación. Delas destacan as carencias nas aprendizaxes previas do alumnado e a necesidade de traballar a educación sexual de forma sistémica dende unha perspectiva construtivista