Paano nalikha ang proyektong ito? Sabihin na lamang natin na tama si Shakespear, ang mundo ay isang malaking entablado, isang tanghalan, at kay dami nang nangyari na hindi puwedeng kalimutan, mga nangyayari na kailangang tandaan at mga pangyayari na kailangang bantayan, nakabukas man ang tabing o hindi, patay man ang ilaw, wala mang mga manonood, o kahit takot man sila magsalita o umiyak o makisimpatya sa mga tauhang pinakulong at pinahuli at pinaratangan. Isinulat ko ito upang tiyaking kahit wala na ang tanghalan, ang mga libro ang magsisilbing entablado ng mga katotohanang aking isinasalaysay, ang tekstong ito naman ang magsisilbing sisidlan ng alaala ng mga kaganapan, mabuti man o hindi, masaya man o malungkot, mapait man o matamis ang ikinikintal na gunita.