Iban Zalduaren Ipuina engainua da 2022ko liburuko «Ipuina adulterioa da» narrazioa xeheki aztertuko da. Bi plano dituen ipuina izanik –ipuingintzaren inguruko plano metafikzionala eta adulterio-istorio baten kontaketa–, haien arteko mugak nola lausotzen diren behatuko da. Helburu bikoitza du analisiak: (euskal) ipuingintzaz Zalduak eginiko gogoetak biltzea eta, gogoeta horiexek Zalduaren ipuin zehatz horretan nola txertatzen diren berresteaz gain, Zalduaren ipuingintzaren zenbait gako aletzea. Era berean, aztertuko dugu ipuingintzaren esentziaren aldeko argudioak eta bestelako gakoak ez direla Elenaren koadernoko plano metafikzionalean gertatzen, adulterioaren abenturaren lerroartean baizik.