Artikulu honetan geografiaren luze-zabalean homonimoak dauzkaten Trebiñu aldeko herri batzuen izenak izan ditut ikergai. Izen bera partekatzeak noiz edo noiz adituen lanetan eragin izan dituen zenbait nahaste arakatzea izan dut helburu, besteak beste Erdi Aroko kartularioetako informazioa bilduz. Bereziki arreta jarri dut Trebiñu aldeko Doroñu eta Pangua herriek Toloñoko mendilerroaren hegoaldean, Nafarroako Sonsierra zeritzan eskualdean, izenkide zeuzkaten herri hustuetan, eta historiagileen iritzi nagusiak biltzen ahalegindu naiz, birpopulatze-toponimoak ala, ordea, inguru hartan era autonomoan sortuak ote diren gogoeta egite aldera. Doroñu izenari dagokionez, balegoke zantzu nahikorik Tv(l)lonivm teonimoaren euskal bilakaera ote den galdera plazaratzeko. Hainbatetan bezala, jakintza-arlo desberdinetako lankidetzaren beharrean gaude erantzun beteagoa erdietsiko bada.