O 3 de xullo de 1998 a Real Academia Galega acordou dedicar o Día das Letras Galegas de 1999 a Roberto Blanco Torres, excelente poeta galego nun tempo de importantes poetas e un dos grandes xornalistas na España dos anos vinte e trinta. Autor de libros non reeditados e escritor nunca estudado, a designación académica sorprendeu a non poucas persoas, algunhas do eido literario. Se as catro décadas ominosas do franquismo foron adversas para certos escritores galegos, é moi difícil atopar un escritor republicano tan sometido a unha tan dura lei de silencio. Co título Letras galegas recollemos os textos nos que Roberto Blanco Torres se pronunciou sobre os nosos escritores. Moitos dos textos aquí recolleitos exhúmanse por primeira vez.