Læreplanen og norskdidaktikken knyter oftast kritisk lesing til sakprosa, og kritisk lesing av skjønnlitterære tekstar er mindre vanleg. I læreplanen for Kunnskapsløftet (LK20) legg ein i det tverrfaglege temaet demokrati og medborgarskap vekt på at individet både har rett og plikt til å delta i samfunnet, og at borgarar må bruke retten sin til politisk deltaking. I artikkelen vil eg gjere ein visuell kritisk analyse av tre oppslag frå den grafiske romanen La skogen leve! av Nora Dåsnes. I boka følgjer vi ei gruppe barn som engasjerer seg i ei sak som er viktig for dei, og kva barna gjer for å påverke avgjerdene i samfunnet dei er ein del av. Dette kjem ikkje berre fram gjennom ord, men også gjennom den visuelle framstillinga. Artikkelen vil vidare tematisere det didaktiske potensialet i ein visuell kritisk analyse om ein vil øve opp barn og unge si kritiske vurdering av invitasjonar til medborgarskap og demokratideltaking.