Ushbu maqolada tijorat banklarida raqamli transformatsiya jarayonlari va moliyaviy texnologiyalarning (fintex yechimlarining) bank faoliyati samaradorligiga ko‘rsatgan ta’siri tahlil qilinadi. So‘nggi yillarda bank sektorida raqamli texnologiyalarni joriy etish moliyaviy xizmatlar sifatini oshirish, xarajatlarni qisqartirish, mijozlar bilan o‘zaro aloqani yaxshilash hamda bankning raqobatbardoshligini kuchaytirishda muhim omilga aylangan. Tadqiqot davomida O‘zbekiston bank tizimidagi raqamli modernizatsiya ko‘rsatkichlari, mobil va internet banking xizmatlarining kengayishi, shuningdek, fintex kompaniyalari bilan hamkorlikning iqtisodiy samaralari o‘rganilgan. Maqolada statistik tahlillar asosida raqamli texnologiyalarni joriy etgan tijorat banklarining rentabellik darajasi va mijozlar bazasi o‘sish sur’atlari o‘rtasidagi bog‘liqlik aniqlangan. Tadqiqot natijalari raqamli transformatsiyaning bank sektorida moliyaviy barqarorlikni ta’minlash, operatsion samaradorlikni oshirish va xizmatlar diversifikatsiyasini kengaytirishdagi o‘rni yuqoriligini tasdiqlaydi.