Ushbu maqolada milliy iqtisodiyotda kichik tadbirkorlikning tutgan o‘rni va uning ijtimoiy-iqtisodiy rivojlanishga qo‘shayotgan hissasi tahlil qilingan. Bugungi kunda kichik biznes nafaqat yangi ish o‘rinlari yaratish, aholining bandligini ta’minlash, balki raqobat muhitini shakllantirish, innovatsion faoliyatni rag‘batlantirish va ishlab chiqarish samaradorligini oshirishda ham muhim ahamiyat kasb etmoqda. O‘zbekiston Respublikasida kichik tadbirkorlikni qo‘llab-quvvatlash davlat siyosatining ustuvor yo‘nalishlaridan biri bo‘lib, u iqtisodiy barqarorlikni mustahkamlash, hududlarni rivojlantirish va xalq farovonligini oshirishda hal qiluvchi o‘rin tutadi. Mazkur maqolada yurtimizda kichik tadbirkorlikni rivojlantirish bo‘yicha amalga oshirilayotgan ishlar ko‘lami, kichik biznesning iqtisodiyotdagi ulushi, eksport salohiyati va hududiy rivojlanishga qo‘shayotgan hissasi tahlil qilinadi va amaliy misollar asosida ko‘rsatib o‘tiladi.