Kva slags preferansar har ungdom i alderen 16-17 år for deltaking i eit kyrkjeleg fellesskap? Og kva rolle spelar sosial kapital for ungdom i fellesskapet? I denne oppgåva ynskjer eg å belyse kvifor ungdom søkjer eit kyrkjeleg fellesskap. Om ein ungdom skal trivast bør vedkomande vere komfortabel i settinga. Ein riktig motivert ungdom vil då kunne nyte godt av alt det eit fellesskap kan kome med. Og eit fellesskap er viktig. Det sosiale er noko mange ungdomar oppsøker og set pris på. Det kyrkjelege fellesskapet har då også gjort suksess med å leggje til rette for ungdomen. Men det er dermed ikkje sagt at ein har eit fasitsvar på korleis dette skal gjerast. Det kan fungere så og så lenge, men plutseleg kan det seie slutt. Eg vil heller ikkje kome fram til eit fasitsvar, men eg vil likevel prøve å belyse nokon av sidene for kvifor ungdom deltek i eit kyrkjeleg fellesskap. Av dei ungdomane eg har intervjua så kan ein tydeleg sjå at den sterkaste tilknytinga til eit kyrkjeleg fellesskap er det sosiale aspektet. Anten det er fordi dei blir sosialisert inn i det, eller dei vel det rasjonelt fordi venane er der, eller fordi dei vil få fleire vener og skaffe seg ein sosial kapital så er det det sosiale som knyt dei for det meste saman.